परराष्ट्रमन्त्री शिशिर खनालले संयुक्त राष्ट्रसंघका महासचिव एन्टोनियो गुटेरेससँग भेटवार्ता गरेका छन्।
राष्ट्रसंघीय जलवायु परिवर्तनसम्बन्धी पक्षराष्ट्रहरूको ३१औं सम्मेलन (कोप-३१) का अवसरमा टर्कीको अन्ताल्यामा उनीहरूबीच द्विपक्षीय भेटवार्ता भएको हो।
परराष्ट्रमन्त्री खनालले भोटेकोशी बाढीपछि नेपालप्रति समवेदना र ऐक्यबद्धता व्यक्त गरेकामा महासचिव गुटेरेसप्रति हार्दिक आभार व्यक्त गरे। उनले राष्ट्रसंघको नेतृत्व गर्दै बहुपक्षीयता, विश्व शान्ति, मानवीय गरिमा र दिगो विकासका लागि महासचिवले पुर्याएको योगदानको प्रशंसा गरे।
महासचिव गुटेरेसले राष्ट्रसंघीय शान्ति स्थापना मिसनमा सेना तथा प्रहरी पठाउने प्रमुख राष्ट्रका रूपमा नेपालले विश्व शान्ति र स्थायित्वमा पुर्याउँदै आएको महत्त्वपूर्ण योगदानको सराहना गरे।
भेटमा दुवै पक्षबीच नेपालको पुनर्स्थापना तथा पुनर्निर्माण प्रयास, विश्वव्यापी शासन प्रणालीमा सुधारको आवश्यकता, बहुप्रकोप पूर्वसूचना प्रणाली, जलवायु वित्तमा वृद्धि तथा जलवायु कार्यका विषयमा समेत विचार आदानप्रदान भएको थियो।
उक्त भेटमा क्षेत्रीय तथा विश्वव्यापी महत्त्वका विषयमा छलफल हुनुका साथै जलवायु परिवर्तनका चुनौती सम्बोधन गर्न अन्तर्राष्ट्रिय सहकार्य र बहुपक्षीय प्रयासलाई थप प्रभावकारी बनाउने विषयमा समेत कुराकानी भएको थियो।
